రేఖా చిత్రావారి 'ఖిలాడి' హిందీ చిత్రం అక్టోబరు 26వ తేదీన విడుదల అయింది. ఈ చిత్రంలో క్తతి యుద్ధాలూ, గుర్రపు స్వారీలూ, జెమినీ సర్కస్సూ ఉన్నాయి. నాయకుడుగా రంజన్ చక్కగా చేశాడు. అతను ఇందులో ఒకే పోలికలు కల ఇద్దరబ్బాయిల వేషాలు వేశాడు. నాయికగా జబీన్ నటించింది. నర్తకిగా నటించిన నూతన తార షకీలాబానో భోపాలీ...

ప్రసాద్ ఆర్టు పిక్చర్స్ వారి రజతోత్సవ చిత్రం 'ఇల్లరికం' ఆధారంగా ప్రసాద్ ప్రొడక్షన్సువారు నిర్మించిన 'ససురాల్' చిత్రం ఉత్తర హిందూస్థానంలో దిగ్విజయయాత్ర జరిపి, పెక్కు కేంద్రాలలో శత దినోత్సవాలు, రజతోత్సవాలు చేయించుకొని, ఈ నెల 13వ తేదీన ఆంధ్రదేశంలో విడుదల అయింది. 'ఇల్లరికం' చిత్రాన్ని చూసిన అశేష ప్రజానీకానికి ఈ చిత్రాన్ని గురించి వేరే చెప్పనక్కరలేదు. ఆ చిత్రానికి సరిగా నకలుగా ఉంది ఈ చిత్రం. రజతోత్సవ చిత్రమనే యోగ్యతాపత్రం చేతపట్టుకొని వచ్చింది కనుక ఇది వినోద ప్రధాన చిత్రం అవునా కాదా అని తటపటాయించవలసిన పని లేదు. బాక్సాఫీసు హంగులు ఎన్ని ఉంటే ఇంత విజయాన్ని సాధించగలిగిందో మనం అంచనా వేసుకో వచ్చు. ఈ చిత్రం ఆంధ్రదేశంలో ఇంత ఆలస్యంగా 'అడుగు పెట్టడానికి కారణం ఉంది. తెలుగు ప్రేక్షకులు 'ఇల్లరికం' చిత్రాన్ని ఎంత ఎక్కువగా మరచిపోతే అంత ఎక్కువగా ఈ చిత్రానికి డబ్బులు వస్తాయి.

'ఛాయా' చిత్రం ఎ.వి.యం. సంస్థ ఆర్జించుకొన్న పేరును నిలబెట్టగల విధంగా ఉంది. లోగడ ఎ.వి.యం. సంస్థకు విశేషంగా ధనం ఆర్జించి పెట్టిన చిత్రాల కోవకే చెందుతుంది ఈ చిత్రం కూడా. హృషీకేశ్ ముఖర్జీ పేరును చూసికాక ఎ.వి.ఎం. సంస్థ పేరును చూసి, ఈ చిత్రం స్థాయిని అంచనా వేసుకుని చూస్తే ఆశాభంగం కలగదు. తన అభిరుచులకు, సంప్రదాయాలకు స్వస్తి చెప్పి ఎ.వి.యం. వారి అభిరుచులకు అనుగుణంగా ఆయన ఈ చిత్రాన్ని తయారు చేశారు. ఈ చిత్ర నిర్మాణంతో ఆయన తన కీర్తిమకుటానికి కాక, ఎ.వి.యం. వారి కీర్తిమకుటానికి మరొక కొత్త ఈకను తగిలించారు. 'అనురాధ' మార్కు చిత్రాలనే కాక, ఎ.వి.యం. మార్కు చిత్రాలను కూడా తాను నిర్మించగల సమర్థుడనని ఆయన రుజువుచేసుకున్నాడు. అసలు ఆయన తీయగలిగినవి ఇటువంటి చిత్రాలేననీ, 'అనూరాధ' వంటి ఒకటి రెండు చిత్రాలను పొరపాటునో, గ్రహపాటునో నిర్మించారనీ ఈ చిత్రం వల్ల కొందరు అనుమానించే ప్రమాదం ఉన్నది.

పాపం పెచ్చుపెరిగి, ప్రళయం విరుచుకుపడబోతున్నప్పుడు ధర్మదేవత మూడు కాళ్ళు విరక్కొట్టుకొని నాలుగో పాదంపై అల్లాడుతున్నప్పుడు, ధర్మసంస్థాపనార్థం భగవంతుడు భూమిమీద అవతారాలు తాల్చినట్లే -డబ్బింగ్ చిత్రాల హోరు పరాకాష్ట నందుకొని ప్రేక్షకుల మనస్సులు కకావికలమై, తలలు పగిలిపోగల పరిస్థితి ఏర్పడినప్పుడు, సినీ ప్రపంచంలో కళాదేవత ఒంటికాలిపై అఘోరిస్తున్నప్పుడు, మలయమారుతంలా, పన్నీటిజల్లులా, వేణుగీతంలా సేదతీర్చి, హాయికూర్చి, ప్రేక్షకమనస్సులలో ఆశాభావాలను చిగురెత్తించడానికి ఏ నాలుగు నెలలకో అయిదు నెలలకో ఒకసారి కళాత్మకం, వినోదాత్మకం అయిన - 'హమ్ దోనో' వంటి - చిత్రాలు విడుదల అవుతూ ఉంటాయి. సకాలంలో ఇటువంటి చిత్రాలు వచ్చి ఆదుకొంటున్నందువల్లనే సినీమా పరిశ్రమ విద్యావంతుల కోపానలానికి, శాపానలానికి ఆహుతి కాకుండా పోతున్నదేమో.

శంకర్ మూవీస్ వారి 'డార్క్ స్ట్రీట్' హిందీ డిటెక్టివ్ చిత్రం. తెలుగులో ఈనాడు లారీల కొద్దీ ఉత్పత్తి అవుతూ, తెలుగు పాఠకుల, ప్రేక్షకుల ఆదరాభిమానాలకు గురి అవుతున్న డిటెక్టివ్ నవలలకు నకలుగా ఉంది ఈ చిత్రం. ఈ 'అపరాధపరిశోధన' తెలుగులో చలన చిత్రాలకు వ్యాపించకుండా, కేవలం సాహిత్యానికే పరిమితమై ఉండడం మన అదృష్టం. పాపం హిందీ, తమిళ రంగాలలో ఈ అపరాధ పరిశోధన... చలన చిత్రాలకూ, సాహిత్యానికీ కూడా పట్టింది.

ఉత్తర హిందూస్థానంలో శతదినోత్సవాలు, రజతోత్సవాలు చేయించుకున్న అంజలీ పిక్చర్సు వారి 'సువర్ణసుందరి' హిందీ చిత్రం ఈ నెల 24వ తేదీన ప్రప్రథమంగా ఆంధ్రదేశంలో విడుదల అయింది. ఈ చిత్రం అంతకు ముందు తెలుగులో నిర్మించబడి ఆంధ్రప్రదేశ్ లో రజతోత్సవాలు చేయించుకున్న విషయం పాఠకులకు విదితమే. 'సువర్ణసుందరి' తెలుగు చిత్రం రెండవ సారి కూడా ఆంధ్రదేశంలో విడుదలై విశేషంగా ధనం ఆర్జించింది. ఈ హిందీ చిత్రం ఉత్తరాదిన మూడు సంవత్సరాల క్రితమే విడుదల అయింది. ఈ చిత్రాన్ని హిందీలోకి డబ్ చేయకుండా కొందరు అగ్రశ్రేణి బొంబాయి తారలను కూడా చేర్చి పునర్నిర్మించారు. ఉత్తరాది మార్కెట్ లో ఇంత ఘన విజయాన్ని సాధించిన దక్షిణాది చిత్రం మరొకటి లేదు. ఈ చిత్రంలో ఆదినారాయణరావు కూర్చిన సంగీతం ఉత్తరాది శ్రోతల విశేషాదరణకు పాత్రమయింది. ఆ సంవత్సరం బొంబాయి ఫిలిం ఫ్యాన్స్ సంఘం వారు ఆదినారాయణరావును ఉత్తమ సంగీతదర్శకునిగా ఎన్నుకున్నారు.

హిచ్ కాక్ శైలిని అనుకరిస్తూ బి.ఆర్. ఛోప్రా నిర్మించిన 'కానూన్' చిత్రం ఇంతవరకు ఇండియాలో తయారైన క్రైం చిత్రాలన్నింటిలోకి శ్రేష్ఠమైనదని చెప్పవచ్చు. 13,083 అడుగులు నిడివిగల ఈ చిత్రంలో అనౌచిత్యంగానీ, అసహజత్వంగానీ ఒక్క 'ఫ్రేం'లో కూడా కనుపించవు. వ్యర్థమైన ఒక్క సన్నివేశంగానీ, ఒక్క పదం గానీ ఈ చిత్రంలో లేదు. చిత్రంలో దాదాపు సగం భాగం కోర్టు సన్నివేశాలతో నిండి ఉన్నప్పటికీ అరక్షణం సేపు కూడా విసుగుపుట్టించకుండా చిత్రీకరణలో అద్భుత ప్రావీణ్యాన్ని ప్రదర్శించాడు దర్శకుడు బి.ఆర్.ఛోప్రా. సంగీతంలో గానీ, ఛాయాగ్రహణంలో గానీ, ఇతర అంశాలలో గానీ ఈ చిత్రం ఉత్తమ శ్రేణి హాలీవుడ్ చిత్రాలకు దీటువచ్చే స్థాయిలో ఉంది.

ఇది ఇద్దరబ్బాయిలూ, ఒక అమ్మాయి కథ. అబ్బాయిలిద్దరూ బాల్య స్నేహితులు. పొరపాటున ఒకరికి తెలియకుండా మరొకరు ఒకే అమ్మాయిని ప్రేమిస్తారు. ఆ అమ్మాయి మాత్రం వారిలో ఒకరి (హీరో)నే ప్రేమిస్తుంది. కాని అతను పేదవాడు కావడం చేత వాళ్ళ నాన్నగారు ఆమెను రెండో అబ్బాయికి ఇచ్చి పెళ్ళి చేయాలనుకుంటాడు. హీరో బి.ఎ. ఫస్ట్ క్లాస్ లో ప్యాసవుతాడు. ఎన్.సి.సి.లో రాంక్ సంపాదించుతాడు. అయినా ఉద్యోగం దొరకదు. తండ్రి చనిపోతాడు. తర్వాత అతను సైన్యంలో సిపాయిగా చేరుతాడు. అతని స్నేహుతుడు మెడిసన్ చదవడానికి విదేశాలకు వెళ్తాడు. కొన్నాళ్ళకి చదువు ముగించుకుని అతను, సెలవు పెట్టి ఇతను వాళ్ల ఊరికి చేరుకుంటారు. పెళ్ళి ప్రస్తావన వస్తుంది. ఇద్దరూ ఒకే అమ్మాయిని ప్రేమించినట్టు తెలుసుకుని చాలా బాధపడతారు. విరక్తితో హీరో సైన్యానికి వెళ్ళిపోతాడు. ఆ అమ్మాయి ఇల్లు విడిచి నర్సుగా చేరుతుంది. క్లైమాక్సులో పెద్ద యుద్ధం జరుగుతుంది. హీరో అనేక సాహస కృత్యాలు చేసి గాయపడతాడు. ఆపరేషన్ రూములో అతను, ప్రేయసి (నర్సు), స్నేహితుడు (డాక్టరు), కలుసుకుంటారు. ఆపరేషన్ సవ్యంగా జరుగుతుంది. స్నేహితుడు తన ప్రేమను త్యాగం చేస్తాడు. హీరో, హీరోయిన్ కులాసాగా ఉంటారు.

సైగల్ బ్రదర్స్ నిర్మించిన 'కరోర్ పతి' హిందీ చిత్రం మే 19వ తేదీన విజయవాడ శేష్ మహల్ లో విడుదల అయ్యింది.

ఇండియాలో మంచి డిటెక్టివ్ చిత్రం వెలువడడం విశేషమే. డిటెక్టివ్ చిత్రం తీయడానికి ప్రత్యేక ప్రతిభ అవసరం. ఈ మధ్య హిందీలో ఇటువంటి చిత్రాలు కొల్లలుగా వెలువడుతున్నాయి. వీటిలో నూటికి నాలుగైదు చిత్రాలయినా సంతృప్తికరమైనవి వెలువడడం లేదు. ఈ చిత్రాలలో నిజానికి సంగీతం, ఛాయాగ్రహణం చక్కగా ఉంటున్నాయి. కానీ వీటిలో తరచుగా కనుపించే పెద్దలోపం ఒకటుంది. ఈ చిత్రాలలో సస్పెన్సును పోషించడం సరిగా జరగడం లేదు. అనవసరమైన నృత్యాలతో, పాటలతో, హాస్యంతో ప్రేక్షకుల దృష్టిని కథ మీద నుంచి మళ్ళించి చికాకు కల్గిస్తున్నారు. దీనివల్ల ప్రేక్షకుల ఉత్కంఠస్థాయి దిగజారిపోతున్నది. సస్పెన్స్ ఖూనీ అయిపోతున్నది. ఈ చిత్రాల నిడివి ఇంకా బాగా తగ్గాలి.